Author - Ath Ell

ការពង្រឹងសមត្ថភាពអ្នកជំនាញជួរមុខ ដើម្បីលើកកម្ពស់គុណភាពសេវាសម្រាប់អ្នកមានកម្សោយក្នុងការស្តាប់ និងអ្នកនៅរស់រានមានជីវិតពីអំពើហិង្សាទាក់ទងនឹងយេនឌ័រ

សម្រាប់អ្នកនៅរស់រានមានជីវិតពីអំពើហិង្សាទាក់ទងនឹងយេនឌ័រ (GBV) ការរៀបរាប់ពីបទពិសោធន៍របស់ខ្លួន និងការស្វែងរកយុត្តិធម៌អាចជារឿងលំបាកមួយ។ សម្រាប់ស្ត្រីគថ្លង់ មានការលំបាកក្នុងការប្រាស្រ័យទាក់ទង ឬអ្នកមកពីសហគមន៍ជនជាតិដើមភាគតិច ប្រឈមឧបសគ្គទាំងនេះកាន់តែខ្លាំង ដោយសារការទទួលបានសេវាពីនគរបាល ស្ថាប័នផ្នែកច្បាប់ និងសេវាគាំទ្រផ្សេងៗ ជាញឹកញាប់ត្រូវការអ្នកបកប្រែភាសាសញ្ញា ឬភាសាជនជាតិដើមភាគតិចដែលមានសមត្ថភាព។ ទោះជាយ៉ាងណា ការទទួលបានអ្នកបកប្រែដែលបានទទួលការបណ្តុះបណ្តាលនៅតែមានកម្រិត ជាពិសេសនៅក្នុងបរិបទសេវាច្បាប់ និងសេវាគាំទ្រ។ ដើម្បីដោះស្រាយបញ្ហាប្រឈមទាំងនេះ រដ្ឋាភិបាលអូស្ត្រាលីកំពុងវិនិយោគលើការគាំទ្រសេវាបកប្រែ និងសេវាប្រកបដោយបរិយាបន្ន ដើម្បីជួយស្ត្រី និងក្មេងស្រីទាំងមាន និងគ្មានពិការភាព រួមទាំងសហគមន៍ជនជាតិដើមភាគតិច ឱ្យពួកគេអាចទទួលបានការគាំទ្រ អនុវត្តសិទ្ធិរបស់ខ្លួន និងស្វែងរកយុត្តិធម៌។ ថ្មីៗនេះ ដោយមានការគាំទ្រពីរដ្ឋាភិបាលអូស្ត្រាលី អ្នកបកប្រែភាសាសញ្ញា និងភាសាជនជាតិដើមភាគតិច បានចូលរួមវគ្គបណ្តុះបណ្តាលឯកទេសស្តីពី «ការយកចិត្តទុកដាក់លើបញ្ហាយេនឌ័រ សម្រាប់ការបកប្រែឱ្យអ្នកនៅរស់រានមានជីវិតពីអំពើហិង្សាទាក់ទងនឹងយេនឌ័រ»។ វគ្គបណ្តុះបណ្តាលនេះបានពង្រឹងការយល់ដឹងរបស់អ្នកចូលរួមអំពីអំពើហិង្សាទាក់ទងនឹងយេនឌ័រ ច្បាប់ និងនីតិវិធី ពាក់ព័ន្ធ ព្រមទាំងតួនាទីដ៏សំខាន់របស់អ្នកបកប្រែក្នុងការជួយអ្នកនៅរស់រានមានជីវិតឱ្យទទួលបានព័ត៌មាន ការការពារ និងសេវាគាំទ្រចាំបាច់។ វគ្គបណ្តុះបណ្តាលនេះក៏បានពង្រឹងជំនាញ និងទំនុកចិត្តរបស់អ្នកចូលរួមក្នុងការអនុវត្តការបកប្រែប្រកបដោយវិធីសាស្ត្រផ្តោតលើអ្នកនៅរស់រានមានជីវិតជាស្នូល ដោយគោរពតាមក្រមសីលធម៌ និងស្តង់ដាវិជ្ជាជីវៈ សម្រាប់បរិបទសេវាច្បាប់ និងសេវាគាំទ្រផងដែរ។ ការប្រមូលផ្តុំភាគីពាក់ព័ន្ធសំខាន់ៗ វគ្គបណ្តុះបណ្តាលនេះបានប្រមូលផ្តុំអ្នកបកប្រែភាសាសញ្ញា និងភាសាជនជាតិដើមភាគតិច មន្ត្រីរដ្ឋាភិបាល និងតំណាងអង្គការនានាដែលធ្វើការងារលើការទប់ស្កាត់ និងឆ្លើយតបចំពោះអំពើហិង្សា ទាក់ទងនឹងយេនឌ័រ។ អ្នកចូលរួមបានពង្រឹងការយល់ដឹងរបស់ខ្លួនអំពីយេនឌ័រ ទម្រង់ និងផលប៉ះពាល់ផ្សេងៗនៃអំពើហិង្សាទាក់ទងនឹងយេនឌ័រ ព្រមទាំងតម្រូវការជាក់លាក់របស់អ្នកនៅរស់រានមានជីវិត ជាពិសេសអ្នកដែលប្រឈមនឹងឧបសគ្គបន្ថែមក្នុងការប្រាស្រ័យទាក់ទង និងក្នុងការទទួលបានសេវា។ ពួកគេក៏បានបង្កើនចំណេះដឹងអំពីច្បាប់កម្ពុជា នីតិវិធីច្បាប់ សេវាដែលមានស្រាប់ និងប្រព័ន្ធបញ្ជូនបន្តសម្រាប់អ្នកនៅរស់រានមានជីវិតពីអំពើហិង្សាទាក់ទងនឹងលើយេនឌ័រ។ វគ្គបណ្តុះបណ្តាលនេះដែរ ក៏បានពង្រឹងការយល់ដឹងរបស់អ្នកចូលរួមអំពីតួនាទីវិជ្ជាជីវៈ និងការទទួលខុសត្រូវផ្នែកក្រមសីលធម៌ នៅពេលបកប្រែសម្រាប់អ្នកនៅរស់រានមានជីវិត។ តាមរយៈការពិភាក្សាយ៉ាងផុសផុល និងលំហាត់អនុវត្តជាក់ស្តែង អ្នកចូលរួមបានស្វែងយល់ពីគំរូអនុវត្តល្អៗ និងកំណត់វិធីសាស្ត្រកែលម្អសេវាបកប្រែ និងការគាំទ្រផ្នែកការប្រាស្រ័យទាក់ទងសម្រាប់អ្នកនៅរស់រានមានជីវិតនៅទូទាំងដំណើរការស្វែងរកយុត្តិធម៌ និងការស្ដារឡើងវិញរបស់ពួកគេ។ លោកស្រី Sophia Cason ប្រធានកម្មវិធី ACCESS 2 បានគូសបញ្ជាក់ពីសារៈសំខាន់នៃការពង្រឹងសមត្ថភាពទាំងអ្នកបកប្រែ និងអ្នកផ្តល់សេវា។ លោកស្រីបានលើកឡើងថា វគ្គបណ្តុះបណ្តាលនេះបានផ្តល់ឱ្យអ្នកចូលរួមនូវការយល់ដឹងកាន់តែស៊ីជម្រៅអំពីទម្រង់ផ្សេងៗនៃអំពើហិង្សាទាក់ទងនឹងយេនឌ័រ ច្បាប់ និងនីតិវិធីច្បាប់ពាក់ព័ន្ធ សេវាគាំទ្រដែលមានស្រាប់ និងប្រព័ន្ធបញ្ជូនបន្ត។...


អូស្ត្រាលី និងកម្ពុជា រួមគ្នាពង្រឹងសេវាថែទាំអ្នកដំបៅជើងទឹកនោមផ្អែម

ប្រទេសអូស្ត្រាលីកំពុងគាំទ្រការពង្រីកសេវាថែទាំអ្នកដំបៅជើងទឹកនោមផ្អែម ជាផ្នែកមួយនៃសេវាស្តារលទ្ធភាពពលកម្មនៅមន្ទីរពេទ្យបង្អែកជ័យជំនះ ខេត្តកណ្តាល ដើម្បីជួយពង្រឹងការឆ្លើយតបរបស់កម្ពុជាចំពោះការកើនឡើងនៃជំងឺមិនឆ្លង។ នៅថ្ងៃទី៦ ខែវិច្ឆិកា ឆ្នាំ២០២៦ លោកស្រី Kate Sangster លេខាទី១ នៃស្ថានទូតអូស្ត្រាលីប្រចាំកម្ពុជា និងឯកឧត្តម វេជ្ជបណ្ឌិត ង៉ូវ កាង រដ្ឋលេខាធិការក្រសួងសុខាភិបាល បានអញ្ជើញចូលរួមក្នុងពិធីសម្ពោធដាក់ឱ្យដំណើរការជាផ្លូវការនូវសេវាថែទាំអ្នកដំបៅជើងទឹកនោមផ្អែម នៅមន្ទីរពេទ្យបង្អែកជ័យជំនះ។ ការសម្ពោធនេះ គឺជាជំហានដ៏សំខាន់មួយក្នុងការពង្រឹងសេវាស្តារលទ្ធភាពពលកម្មនៅក្នុងប្រព័ន្ធសុខាភិបាលរបស់កម្ពុជា។ សេវាស្តារលទ្ធភាពពលកម្មកំពុងត្រូវបានទទួលស្គាល់កាន់តែខ្លាំងថាជាផ្នែកដ៏ចាំបាច់នៃការថែទាំសុខភាព ជាពិសេសស្របពេលដែលកម្ពុជាកំពុងប្រឈមមុខនឹងការកើនឡើងនៃជំងឺមិនឆ្លង ដូចជា ជំងឺទឹកនោមផ្អែម ជំងឺគ្រោះថ្នាក់សរសៃឈាមខួរក្បាល និងជំងឺផ្សេងៗ ដែលអាចប៉ះពាល់ដល់សមត្ថភាពក្នុងការចល័ត ឯករាជ្យភាពក្នុងការរស់នៅ និងគុណភាពជីវិតរបស់ប្រជាពលរដ្ឋ។ តាមរយៈភាពជាដៃគូរវាងកម្មវិធី ACCESS 2 ដែលទទួលបានការគាំទ្រថវិកាពីរដ្ឋាភិបាលអូស្ត្រាលី តាមរយៈអង្គការ Exceed Worldwide និងមន្ទីរពេទ្យបង្អែកជ័យជំនះ បានបង្ហាញពីរបៀបដែលសេវាស្តារលទ្ធភាពពលកម្មត្រូវបានបញ្ចូលទៅក្នុងផ្នែកស្តារលទ្ធភាពពលកម្មដែលមានមូលដ្ឋាននៅ មន្ទីរពេទ្យ។ វិធីសាស្រ្តនេះអនុញ្ញាតឱ្យអ្នកជំងឺអាចទទួលបានសេវាស្តារលទ្ធភាពពលកម្ម​ ទទួលបានឧបករណ៍ជំនួយ និងសេវាថែទាំសុខភាពផ្សេងៗទៀតប្រកបដោយការសម្របសម្រួល និងទាន់ពេលវេលា។ ថ្លែងនៅក្នុងសុន្ទរកថានៅក្នុងពិធីសម្ពោធ ឯកឧត្តម វេជ្ជបណ្ឌិត ង៉ូវ កាង បានគូសបញ្ជាក់ពីសារៈសំខាន់នៃការសម្ពោធនេះថា ជាសមិទ្ធផលដ៏សំខាន់មួយទៀតក្នុងការពង្រឹងសេវាស្តារលទ្ធភាពពលកម្មនៅក្នុងប្រព័ន្ធសុខាភិបាលកម្ពុជា តាមរយៈកិច្ចសហការដ៏រឹងមាំរវាងក្រសួងសុខាភិបាល រដ្ឋាភិបាលអូស្ត្រាលី កម្មវិធី ACCESS 2 និងអង្គការ Exceed Worldwide។ ឯកឧត្តម វេជ្ជបណ្ឌិត ង៉ូវ កាង មានប្រសាសន៍ថា៖ «ការបង្កើតផ្នែកស្តារលទ្ធភាពពលកម្មដែលមានមូលដ្ឋាននៅក្នុងមន្ទីរពេទ្យ ដែលមានសេវាថែទាំអ្នកជំងឺទឹកនោមផ្អែមនេះ បង្ហាញពីការប្តេជ្ញាចិត្តរបស់ក្រសួងសុខាភិបាលក្នុងការពង្រឹងសេវាស្តារលទ្ធភាពពលកម្មនៅក្នុងប្រព័ន្ធសុខាភិបាលជាតិ»។ ឯកឧត្តម វេជ្ជបណ្ឌិត បានមានប្រសាសន៍បន្ថែមថា៖ «ខ្ញុំសូមថ្លែងអំណរគុណយ៉ាងជ្រាលជ្រៅដល់រដ្ឋាភិបាលអូស្ត្រាលី តាមរយៈកម្មវិធី ACCESS 2 អង្គការ Exceed Worldwide មន្ទីរសុខាភិបាលខេត្តកណ្តាល និងមន្ទីរពេទ្យបង្អែកជ័យជំនះ ចំពោះភាពជាដៃគូ និងការប្តេជ្ញាចិត្តដ៏រឹងមាំ»។ ថ្លែងក្នុងពិធីនេះដែរ លោកស្រី Kate Sangster បានបញ្ជាក់ជាថ្មីនូវការប្តេជ្ញាចិត្តរបស់ប្រទេសអូស្ត្រាលីក្នុងការបន្តធ្វើការជាមួយរាជរដ្ឋាភិបាលកម្ពុជា និងដៃគូក្នុងស្រុក...