កាលបរិច្ឆេត៖ ថ្ងៃទី២២ ខែសីហា ឆ្នាំ២០២៥
ទីតាំង៖ ភ្នំពេញ
ដោយមានការគាំទ្រពីប្រទេសអូស្ត្រាលី គណៈកម្មការប្រឹក្សាភិបាលនៃកម្មវិធី ACCESS 2 (ASC) បានរៀបចំកិច្ចប្រជុំលើកទីពីររបស់ខ្លួន ដែលមានសហប្រធានជាប្រធានផ្នែកកិច្ចសហប្រត្តិបត្តិការអភិវឌ្ឍន៍នៃស្ថានទូតអូស្ត្រាលី និងភាគីរដ្ឋាភិបាលកម្ពុជា (RGC) ដែលតំណាងដោយក្រសួងសុខាភិបាល។ វេទិកានេះបានអញ្ជើញចូលរួម តំណាងមកពីសមភាគីរដ្ឋាភិបាល និងដៃគូពាក់ព័ន្ធ មកជួបជុំគ្នា ដើម្បីជំរុញអាទិភាពរបស់កម្ពុជា ស្តីពីការឆ្លើយតបចំពោះអំពើហិង្សាទាក់ទងនឹងយេនឌ័រ (GBV) បរិយាបន្នពិការភាព និងការស្ដារលទ្ធភាពពលកម្ម។
គោលបំណង៖
- គូសបញ្ជាក់ពីសមិទ្ធផលរបស់ ACCESS 2 ៖ ចែករំលែកនូវលទ្ធផល និងវឌ្ឍនភាពដែលសម្រេចបានរបស់ ACCESS 2 ក្នុងឆ្នាំទី២។
- ឆ្លុះបញ្ចាំងនូវមេរៀនដកពិសោធ៖ ពិនិត្យមើលមេរៀនដកបទពិសោធន៍ ហានិភ័យ និងបញ្ហាសំខាន់ៗ ផ្តល់ការយល់ព្រមលើវិធានការកាត់បន្ថយសមស្របណាមួយ។
- អនុម័តផែនការការងារប្រចាំឆ្នាំសម្រាប់៖ សម្របសម្រួលដល់ការអនុម័តផែនការប្រចាំឆ្នាំ ឆ្នាំទី៣ ពីខែកក្កដា ឆ្នាំ២០២៥ ដល់ខែមិថុនា ឆ្នាំ២០២៦។
អ្នកចូលរួម
យើងមានកិត្តិយសដែលបានអញ្ជើញអ្នកចូលរួមដែលជាតំណាងមកពី៖ ក្រសួងកិច្ចការនារី ក្រសួងសង្គមកិច្ច អតីតយុទ្ធជន និងយុវនីតិសម្បទា ក្រសួងសុខាភិបាល ក្រុមប្រឹក្សាសកម្មភាពជនពិការ ក្រសួងមហាផ្ទៃ និងគណៈកម្មការជាតិសម្រាប់លេខាធិការដ្ឋានអភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិ តំណាងដៃគូអនុវត្តជាយុទ្ធសាស្រ្តរបស់ ACCESS 2 ដែលជាក្រុមការងារផ្នែកអំពើហិង្សាទាក់ទងនឹងយេនឌ័រ ផ្នែកពិការភាព និងផ្នែកការស្តារលទ្ធភាពពលកម្ម អ្នកដឹកនាំនៅថ្នាក់ខេត្តរួមមាន ប្រធានគណៈកម្មការសម្របសម្រួលថ្នាក់ខេត្ត មកពីខេត្តចំនួនបួន ក្រុមការងារកម្មវិធី តំណាងស្ថានទូតអូស្រ្តាលីប្រចាំនៅកម្ពុជា និងក្រុមការងារកម្មវិធី ACCESS 2។
ការពិភាក្សា និងប្តេជ្ញាចិត្ត
សមាជិកបានចែករំលែកបទពិសោធន៍ កំណត់ទិសដៅយុទ្ធសាស្ត្រ និងអនុម័តផែនការងារប្រចាំឆ្នាំ ២០២៥ ដល់ឆ្នាំ២០២៦ ដើម្បីធានាថាវឌ្ឍនភាពរបស់ ACCESS 2 ស្របតាមគោលបំណងរបស់រដ្ឋាភិបាល។
ទស្សនៈរបស់លោកស្រី Kirsty Harris ប្រធានផ្នែកកិច្ចសហប្រត្តិបត្តិការអភិវឌ្ឍន៍នៃស្ថានទូតអូស្ត្រាលី និងជាសហប្រធានកិច្ចប្រជុំ
ប្រទេសអូស្ត្រាលីមានមោទនភាពក្នុងការគាំទ្រកម្មវិធី ACCESS 2 ដែលជាកម្មវិធីដ៏សំខាន់មួយ រួមចំណែកក្នុងការពង្រឹងការឆ្លើយតបចំពោះអំពើហិង្សាទាក់ទងនឹងយេនឌ័រ បរិយាបន្នពិការភាព ការស្ដារលទ្ធភាពពលកម្ម និងកិច្ចគាំពារសង្គមសម្រាប់ជនងាយរងគ្រោះខ្លាំង។ យើងប្តេជ្ញាចិត្តធ្វើការជិតស្និទ្ធជាមួយរដ្ឋាភិបាលកម្ពុជា និងភាគីពាក់ព័ន្ធទាំងអស់ ដើម្បីធានាថាគោលបំណងនៃកម្មវិធីនេះត្រូវបានសម្រេចយ៉ាងមានប្រសិទ្ធភាព និងមាននិរន្តរភាព។
ឯកឧត្តមវេជ្ជបណ្ឌិត ង៉ូវ កាង រដ្ឋលេខាធិការ ក្រសួងសុខាភិបាល និងជាសហប្រធានកិច្ចប្រជុំ
ឯកឧត្ដមបានបង្ហាញការថ្លែងអំណរគុណចំពោះរដ្ឋាភិបាលអូស្ត្រាលី សម្រាប់ការគាំទ្រ និងសហការជាមួយរាជរដ្ឋាភិបាលកម្ពុជា ដែលបានរួមចំណែកក្នុងការបង្កើនការចូលរួមពីសំណាក់ភាគីពាក់ព័ន្ធ រួមមានតំណាងអ្នកទទួលផល និងសមាគមវិជ្ជាជីវៈ ដើម្បីធានាថាសេវាដែលផ្តល់ដល់ជនមានពិការភាព ជនរងគ្រោះដោយអំពើហិង្សាទាក់ទងនឹងយេនឌ័រ និងសហគមន៍ជនជាតិដើមភាគតិច ប្រកបដោយគុណភាព បរិយាបន្ន និងសមធម៌ ពិសេសមិនមានហានិភ័យផ្នែកហិរញ្ញវត្ថុ។
សេចក្ដីសម្រេចសំខាន់ និងជំហានបន្ទាប់
• កិច្ចប្រជុំបានពិនិត្យឡើងវិញ និងអនុម័តលទ្ធផលសំខាន់ៗនៃឆ្នាំទី២។
• បានពិភាក្សាអំពីបញ្ហាប្រឈមសំខាន់ៗ និងយល់ស្របលើវិធានការសមស្របក្នុងការដោះស្រាយបញ្ហា។
• បានអនុម័តផែនការងារប្រចាំឆ្នាំសម្រាប់ឆ្នាំទី៣ គឺឆ្នាំ២០២៥ ដល់ឆ្នាំ២០២៦។
ផ្តោតលើភាពជាអ្នកដឹកនាំជាប្រចាំ និងការប្តេជ្ញាចិត្តពីគណៈកម្មការប្រឹក្សាភិបាល ACCESS 2 កំពុងបន្តការគាំទ្រ និងការសម្របសម្រួលកម្មវិធីឱ្យស្របតាមអាទិភាពរបស់រាជរដ្ឋាភិបាលកម្ពុជា ដើម្បីសម្រេចបានសង្គមមួយប្រកបដោយបរិយាបន្នសម្រាប់មនុស្សគ្រប់រូប៕
