ពេលថ្មីៗនេះ កិច្ចប្រជុំលើកទី៣របស់គណៈកម្មការសម្របសម្រួលខេត្ត (PCC) បានប្រព្រឹត្តទៅនៅខេត្តកំពង់ចាម សៀមរាប និងកំពង់ស្ពឺ។ កិច្ចប្រជុំបានដឹកនាំដោយអភិបាលរងនៃខេត្តនីមួយៗ និងប្រធានកម្មវិធី ACCESS 2។ គណៈកម្មការបានអនុម័តរបាយការណ៍វឌ្ឍនភាពការងាររយៈពេលប្រាំមួយខែ និងផែនការការងារប្រចាំឆ្នាំទី៣។
កិច្ចប្រជុំទាំងនេះបានប្រមូលផ្តុំតំណាងរដ្ឋបាលនៅថ្នាក់ក្រោមជាតិ ដៃគូអនុវត្តជាយុទ្ធសាស្ត្រ (SIPs) និងក្រុមការងារកម្មវិធី ACCESS 2។ ការពិភាក្សាបានផ្តោតលើទិសដៅយុទ្ធសាស្ត្រ ពិនិត្យលើសមិទ្ធផលកម្មវិធី និងការសម្របសម្រួលការងារជាមួយអាទិភាពរបស់ខេត្ត។ គោលបំណងគឺដើម្បីបង្កើនគុណភាពសេវាសម្រាប់សហគមន៍ងាយរងគ្រោះ ។
ជាផ្នែកមួយនៃកិច្ចប្រជុំនេះ តំណាងពីស្ថានទូតអូស្ត្រាលី និងសមាជិក PCC បានធ្វើដំណើរទស្សនកិច្ចសហគមន៍ដែលអនុវត្តសកម្មភាពដោយដៃគូរបស់យើង។ ដំណើរទស្សនកិច្ចនេះបានផ្តល់ឱកាសឱ្យក្រុមការងារ ជួបសន្ទនាដោយផ្ទាល់ជាមួយអ្នកទទួលផល និងអាជ្ញាធរមូលដ្ឋាន ស្តីពីការឆ្លើយតបទៅនឹងអំពើហិង្សាទាក់ទងនឹងយេនឌ័រ(GBV) និងបរិយាបន្នពិការភាព។
ការពិភាក្សា និងប្តេជ្ញាចិត្ត
អ្នកចូលរួមបានផ្តល់ធាតុចូល អំពីការពង្រឹងកិច្ចសហការណ៍រវាងដៃគូ ការស្វែងរកការសម្របសម្រួល និងការធានាថាផែនការងារត្រូវបានអនុវត្តយ៉ាងមានប្រសិទ្ធភាព។ ក្រុមការងារក៏បានលើកឡើងអំពីវឌ្ឍនភាពសំខាន់ៗនៅក្នុងបរិយាបន្នពិការភាព ការឆ្លើយតបចំពោះ GBV និងវិមជ្ឈការ។
ទស្សនៈថ្នាក់ដឹកនាំខេត្ត និងម្ចាស់ជំនួយ
ខេត្តកំពង់ស្ពឺ៖ «ខ្ញុំសូមថ្លែងអំណរគុណយ៉ាងជ្រាលជ្រៅចំពោះក្រុមកម្មវិធី ACCESS 2 និង SIPs សម្រាប់ការចូលរួមកិច្ចប្រជុំ PCC លើកទី៣នេះ» មានប្រសាសន៍ដោយលោកជំទាវ ឡុង បូណារេត អភិបាលរងនៃគណៈអភិបាលខេត្ត។ លោកជំទាវបានមានប្រសាសន៍បន្ថែមថា៖ «ខ្ញុំសូមថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលអូស្ត្រាលីសម្រាប់ការគាំទ្រដ៏សំខាន់ដល់កម្មវិធី ACCESS 2 ដែលធ្វើឱ្យការងារទាំងនេះអាចប្រព្រឹត្តទៅបាន»។
ខេត្តកំពង់ចាម៖ «ខ្ញុំសូមថ្លែងអំណរគុណយ៉ាងជ្រាលជ្រៅចំពោះការរួមចំណែកដ៏មានតម្លៃក្នុងកិច្ចប្រជុំនេះ រួមទាំងការចូលរួមយ៉ាងសកម្ម ការផ្តល់ធាតុចូល និងការប្តេជ្ញាចិត្តរួមគ្នា» មានប្រសាសន៍ដោយលោកជំទាវ ប៉ាង ដានី អភិបាលរងនៃគណៈអភិបាលខេត្ត។ លោកជំទាវក៏បានលើកឡើងពីសារៈសំខាន់នៃដំណើរទស្សនកិច្ចកន្លែងអនុវត្តសកម្មភាព ដែលលោកជំទាវបានបញ្ជាក់ថា «វាបានបង្ហាញឱ្យយើងឃើញពិតប្រាកដនៃផលជះការងាររបស់យើងនៅសហគមន៍ និងបញ្ហាប្រឈមនានាដែលត្រូវការដោះស្រាយបន្ថែម ជាពិសេសនៅតំបន់ដែលមិនទទួលបានសេវាគ្រប់គ្រាន់»។
សៀមរាប៖ «យើងប្តេជ្ញាចិត្តក្នុងការលើកកម្ពស់ការសម្របសម្រួលយ៉ាងរឹងមាំ និងសហការណ៍យ៉ាងមានប្រសិទ្ធភាពរវាងដៃគូសំខាន់ៗទាំងអស់ រួមមានSIPs ក្រុមការងារ ACCESS 2 និងរដ្ឋបាលមូលដ្ឋានរបស់យើង» មានប្រសាសន៍ដោយ ឯកឧត្តម នាក់ ណេរ៉ុន អភិបាលរងនៃគណៈអភិបាលខេត្ត និងជាសហប្រធាននៃកិច្ចប្រជុំ។
ស្ថានទូតអូស្ត្រាលី៖
«កិច្ចប្រជុំលើកទី៣នេះ ជាចំណុចសំខាន់មួយទៀត ដែលបង្ហាញពីការសហការយ៉ាងស៊ីជម្រៅជាងមុនរវាងអាជ្ញាធរខេត្ត និងដៃគូទាំងអស់នៃកម្មវិធី ACCESS 2» មានប្រសាសន៍ដោយលោកស្រី ហ៊ែល សុធារតន៍ ប្រធានគ្រប់គ្រងផ្នែកកម្មវិធីសហប្រតិបត្តិការអភិវឌ្ឍន៍នៃស្ថានទូតអូស្ត្រាលីប្រចាំកម្ពុជា។ លោកស្រីបានលើកទឹកចិត្តយ៉ាងខ្លាំងឱ្យ SIPs បន្តធ្វើការជាមួយមន្ទីរពាក់ព័ន្ធ ដើម្បីពង្រឹងសេវាសំខាន់ៗ។
សេចក្ដីសម្រេចសំខាន់ និងជំហានបន្ទាប់
• ទទួលយករបាយការណ៍វឌ្ឍនភាពការងាររយៈពេល៦ខែ ដែលបានបង្ហាញដោយដៃគូផ្នែក GBV បរិយាបន្នពិការភាព និងដៃគូវិមជ្ឃការ។
• គណៈកម្មការសម្របសម្រួលខេត្ត បានអនុម័តផែនការងាររួមរបស់ខេត្ត ចាប់ពីខែកក្កដា ឆ្នាំ២០២៥ ដល់ខែមិថុនា ឆ្នាំ២០២៦។
• រៀបចំកិច្ចប្រជុំបន្តជាមួយ SIPs និងជនបង្គោលថ្នាក់ស្រុក ដើម្បីពិនិត្យមើលសកម្មភាព និងថវិកា ក្នុងផែនការអភិវឌ្ឍស្រុក (DIP) និងផែនការអភិវឌ្ឍន៍ឃុំ (CIP) ដែលបានបែងចែកសម្រាប់សកម្មភាពសមភាពយេនឌ័រ បរិយាបន្នពិការភាព និងសង្គម ដោយស្រុក និងឃុំ។
• ស្នងការនគរបាលខេត្ត គួរតែផ្តល់ការយល់ដឹងអំពីការធ្វើតេស្ត DNA ដល់អ្នកផ្តល់សេវាផ្នែក GBV។
កិច្ចប្រជុំ PCC លើកទី៣ បានបង្ហាញពីកិច្ចសហការយ៉ាងរឹងមាំរវាងអាជ្ញាធរខេត្ត និងដៃគូទាំងអស់នៃកម្មវិធី ACCESS 2។ កិច្ចសហការនេះធានាថាកិច្ចអន្តរាគមន៍ក្នុងឆ្នាំទី៣ ត្រូវបានសម្របសម្រួលយ៉ាងល្អជាមួយគោលនយោបាយ និងយុទ្ធសាស្ត្ររបស់រដ្ឋាភិបាលកម្ពុជា។ ការខិតខំនេះនឹងជួយសម្រេចគោលដៅរបស់ ACCESS 2 ផងដែរ៖ ដើម្បីធានាថាជនមានពិការភាព និងជនរងគ្រោះដោយអំពើហិង្សាទាក់ទងនឹងយេនឌ័រ ទទួលបានសេវាប្រកបដោយគុណភាព និងមានការសម្របសម្រួល ដូចដែលបានចែងនៅក្នុងអាទិភាពរបស់រាជរដ្ឋាភិបាលកម្ពុជា៕
