ផាសុកវត្ថុ គឺជាមូលដ្ឋានគ្រឹះក្នុងការធានាឱ្យជនមានពិការភាព អាចចូលរួមយ៉ាងពេញលេញនៅក្នុងសង្គម និងទទួលបានសេវាសាធារណៈសំខាន់ៗ ដោយស្របតាមការប្តេជ្ញាជាសកល ដោយមិនមានអ្នកណាម្នាក់ត្រូវបានទុកចោល។ ដោយទទួលស្គាល់ពីសារៈសំខាន់នេះ រដ្ឋាភិបាលអូស្រ្តាលី តាមរយៈកម្មវិធីសហប្រតិបត្តិការអូស្រ្តាលី-កម្ពុជាដើម្បីការផ្តល់សេវាប្រកបដោយនិរន្តរភាព និងសមធម៌ – ដំណាក់កាលទី២ (ACCESS 2) បន្តប្តេជ្ញាចិត្តយ៉ាងមុតមាំក្នុងការលើកកម្ពស់បរិយាបន្នពិការភាព និងសមធម៌សង្គមនៅកម្ពុជា។
នៅក្នុងខែមីនា ឆ្នាំ២០២៥ ACCESS 2 សហការជាមួយអគ្គលេខាធិការដ្ឋានក្រុមប្រឹក្សាសកម្មភាពជនពិការ (DAC-SG) បានរៀបចំវគ្គបណ្តុះបណ្តាលរម្លឹក ស្តីពីផាសុកវត្ថុសម្រាប់សមាជិកក្រុមប្រឹក្សាសកម្មភាពខេត្ត (PDAC) នៅខេត្តគោលដៅចំនួនបី គឺខេត្តកំពង់ស្ពឺ សៀមរាប និងរតនគិរី។ វគ្គបណ្តុះបណ្តាលនេះ ធ្វើឡើងតាមវគ្គបណ្តុះបណ្តាលដែលទទួលបានជោគជ័យកាលពីលើកមុន ដែលបានធ្វើឡើងនៅខេត្តកំពង់ចាមកាលពីខែវិច្ឆិកា ឆ្នាំ២០២៤។
វគ្គបណ្តុះបណ្តាលនេះ បានអញ្ជើញតំណាងមកពី DAC-SG PDAC រដ្ឋាបាលខេត្ត និងមន្ទីរសំខាន់ៗនៅថ្នាក់ក្រោមជាតិ។ អ្នកចូលរួមបានពង្រឹងនូវការយល់ដឹង ស្តីពី បទដ្ឋានបច្ចេកទេសហេដ្ឋារចនាសម្ព័ន្ធបង្កលក្ខណៈងាយស្រួលសម្រាប់ជនមានពិការភាព និងឆ្លុះបញ្ចាំងនូវឧបសគ្គផាសុកវត្ថុដែលមានស្រាប់។ សិក្ខាសាលានេះបានសម្របសម្រួលឱ្យមាននូវកិច្ចសន្ទនា ដើម្បីបញ្ជ្រាបវិធានការផាសុកវត្ថុ នៅក្នុងផែនការសកម្មភាពរបស់នាយកដ្ឋាន ដែលរួមចំណែកដោយផ្ទាល់ដល់ការអនុវត្តប្រកបដោយប្រសិទ្ធភាពនូវផែនការយុទ្ធសាស្រ្តជាតិស្តីពីពិការភាព(NDSP 2024–2028) របស់កម្ពុជា។
វគ្គបណ្តុះបណ្តាល បានផ្តល់នូវចំណេះដឹងដល់អជ្ញាធរមូលដ្ឋាន គាំទ្រដល់កិច្ចប្រឹងប្រែបន្តរបស់គាត់ក្នុងការធានានូវទីធ្លាសាធារណៈ រួមទាំងសាលាឃុំ សាលារៀន និងមណ្ឌលសុខភាព ដែលអាចប្រើប្រាស់បានពេញលេញដូចដែលបានចែងនៅក្នុង NDSP 2024–2028 ។ តាមរយៈការបង្កភាពងាយស្រួលទៅក្នុងផែនការមូលដ្ឋាន អជ្ញាធរខេត្ត បានដើរតួនាទីកាន់តែសំខាន់ ក្នុងការផ្តល់សេវាសាធារណៈ និងហេដ្ឋារចនាសម្ព័ន្ធ ដែលនឹងផ្តល់ជាប្រយោជន៍យ៉ាងសំខាន់ដល់ជនមានពិការភាព ដោយពង្រឹងនូវឯករាជ្យភាព សេចក្តីថ្លៃថ្នូរ និងការចូលរួមនៅក្នុងសង្គម។
តាមរយៈការកសាងសមិទ្ធផលពីកម្មវិធី ACCESS ដំណាក់កាលទី១ ដែលបានផ្តល់នូវការកសាងជម្រាល និងជួសជុលជម្រាលនៅសាលាឃុំ នៅខេត្តកំពង់ចាម កំពង់ស្ពឺ សៀមរាប បាត់ដំបង និងខេត្តក្រចេះ។ ACCESS 2 មានគោលបំណងពង្រីកបន្ថែមនូវជោគជ័យទាំងនេះ។ គំនិតផ្តួចផ្តើមកាលពីមុន និងបច្ចុប្បន្ន បង្ហាញពីកិច្ចសហការយ៉ាងរឹងមាំ រវាង DAC-SG និងអង្គការជនពិការកម្ពុជា អជ្ញាធរថ្នាក់ក្រោមជាតិ ACCESS 2 ដែលនាំឱ្យមានការកែលម្អហេដ្ឋារចនាសម្ព័ន្ធ និងលើកកម្ពស់ការចូលរួមនៅសហគមន៍។
សកម្មភាពទាំងនេះ ស្របគ្នាយ៉ាងខ្លាំងជាមួយនឹងលទ្ធផលពាក់កណ្តាលកម្មវិធី និងលទ្ធផលវិនិយោគចុងបញ្ចប់កម្មវិធីរបស់ACCESS 2 ជាពិសេសការលើកកម្ពស់គុណភាព និងសេវាបរិយាបន្នពិការភាពនៅក្នុងខេត្តគោលដៅ។ ជាងនេះទៀត សកម្មភាពទាំងនោះគាំទ្រដោយផ្ទាល់នូវគោលដៅយុទ្ធសាស្រ្តរបស់រដ្ឋាភិបាលអូស្រ្តាលី ទាក់ទងទៅនឹង បរិយាបន្នពិការភាព សមធម៌សង្គម និងធ្វើឱ្យប្រសើរឡើងនូវផាសុកវត្ថុ ដោយគូសបញ្ជាក់ពីការប្តេជ្ញាចិត្តយូរអង្វែងរបស់អូស្រ្តាលី ចំពោះការអភិវឌ្ឍន៍ប្រកបដោយបរិយាន្ននៅកម្ពុជា។
ACCESS 2 នៅតែប្តេជ្ញាចិត្តចំពោះភាពជាដៃគូរបស់ខ្លួន ជាមួយភាគីពាក់ព័ន្ធរបស់រដ្ឋាភិបាលកម្ពុជា និងដៃគូអនុវត្តជាយុទ្ធសាស្រ្ត ដើម្បីពង្រឹងគោលនយោបាយប្រកបដោយបរិយាន្ន ជំរុញការកសាងសមត្ថភាព និងពង្រឹងសមភាពក្នុងការផ្តល់សេវា។ ការបន្តការចូលរួមយ៉ាងសកម្មរបស់អជ្ញាធរមូលដ្ឋាន និងអ្នកពាក់ព័ន្ធ មានសារសំខាន់ក្នុងការសម្រេចបាននូវនិរន្តរភាពបរិយាបន្នពិការភាព និងផាសុកវត្ថុនៅកម្ពុជា៕
