នេះជាលើកទី១ ដែលក្រុមការងាររបស់កម្មវិធី ACCESS 2 បានចូលរួមប្រារព្វពិធីអន្តរជាតិនារី ឆ្នាំ២០២៤ កាលពីថ្ងៃទី៦ ខែមីនា ឆ្នាំ២០២៤ ដែលជាការបន្តការលើកកម្ពស់ការយល់ដឹង និងពិភាក្សាពីវិធីសាស្រ្តថ្មីៗ ដើម្បីបន្តផ្តល់ភាពអង់អាចដល់ស្រ្តី និងក្មេងស្រីតាមរយៈការងារដែលយើងធ្វើនៅ ACCESS 2។
ឆ្នាំនេះ មូលបទជាសកល «រាប់បញ្ចូលស្រ្តី៖ វិនិយោគលើស្រ្តី ពន្លឿនវឌ្ឍនភាព»។ ជាមួយមូលបទនៅកម្ពុជា «ស្រ្តី និងក្មេងស្រី ក្នុងបរិវត្តកម្មឌីជីថល» ដែលរំលេចពីសក្តានុពល និងភាពចាំបាច់នៃការលើកកម្ពស់សមភាពយេនឌ័រ និងការចូលរួមរបស់ស្រ្តីនៅក្នុងវិស័យឌីជីថល។
ក្រុមការងារបន្តអំពាវនាវក្នុងការលើកកម្ពស់សមភាពយេនឌ័រ ចែករំលែកនូវទិន្ន័យស្តីពីសមភាពយេនឌ័រនៅកម្ពុជា ព្រមទាំងស្វែងរកវិធីសាស្រ្តថ្មីៗ ឆ្ពោះទៅរកការលុបបំបាត់អំពើហិង្សាគ្រប់ទម្រង់ និងការរំលោភបំពានលើស្រ្តី។ ក្រុមការងារបានចែករំលែកនូវឧទាហរណ៍ពីជីវិតជាក់ស្តែង និងទស្សនៈវិស័យក្នុងការលើកកម្ពស់ការយល់ដឹង លើកកម្ពស់សមភាពយេនឌ័រ និងគាំទ្រសិទ្ធិស្រ្តី។
យោបល់មួយចំនួនត្រូវបានចែករំលែកដោយក្រុមការងារ រួមមាន៖ «នៅក្នុងកិច្ចប្រជុំដែលខ្ញុំដឹកនាំ ខ្ញុំនឹងធានាថា អ្នកចូលរួមដែលជាស្រ្តី មានពេលវេលាស្មើគ្នាដូចបុរសក្នុងការនិយាយដែរ» និង «ក្មេងស្រីគួរទៅសាលារៀន មិនមែននៅតែចង្រ្កាននោះទេ»។
លោកស្រី Sophia Casson ប្រធានកម្មវិធី ACCESS 2 នៅក្នុងពិធីប្រារព្វទិវាអន្តរជាតិនារី បានមានប្រសាសន៍ថា៖ «នៅទិវានាររីអន្តរជាតិនេះ យើងចាំថា ដរាបណាស្រ្តីម្នាក់ប្រឈមមុខនឹងការរើសអើង ការបៀតបៀន វិសមភាព ឬការគៀបសង្កត់នានា យើងទាំងអស់គ្នាប្រឈមដូចគ្នា»។
សូមបន្តធ្វើការឆ្ពោះទៅរកសមភាពយេនឌ័រ និងសិទ្ធិស្រ្តី!
